Fyrsta veiði”ferð” ársins

Skellti mér í smá veiði í dag þrátt fyrir rigningu og rok. Planið var að reyna að ná í þessa risa bleikju sem við Gummi sáum á fimmtudag og planið gekk upp. Bleikjan hafði færst sig ofar í lækinn í meiri straum og kastaði ég litlum hvítum nobbler fyrir hana. Þurfti að kasta á móti vindi sem gerði mér erfitt fyrir og eftir að hafa náð að láta fluguna renna fyrir framan nefið á henni tvisvar sinnum án árangurs setti ég aðeins of mikinn kraft í þriðja kastið sem fór aðeins of langt og í strippinu húkkaði ég hana í bakuggann mér til mikillar skelfingar þar sem bleikjan var stór og ég með frekar grannan taum. Hófst þá mikið reipitog þar sem ég reyndi eftir fremsta megni að koma í veg fyrir að hún færi upp lækinn þar sem ég gat ekki elt hana. Beitti ég stönginni mikið til að draga úr álagi á tauminn á sama tíma og ég reyndi að toga þennan hlunk niður lækinn sem tókst að lokum og ég náði að grípa í sporðinn á henni og losa úr henni. Hún virkaði slöpp og skrýtin eitthvað og mig grunar að hún hafi verið komin að hrygningu þrátt fyrir  að nú sé kominn miður febrúar.

Jæja myndin að ofan er af því þegar ég var að ná henni að landi til að losa úr henni og sleppa henni aftur. Ég get ekki sagt að þetta hafi verið neitt sérstaklega gaman þar sem ekki var mikið fjör í bleikjunni. En það er nú alltaf gaman að veiða og fínt að æfa sig í svona litlum læk í leiðindaroki.